يا ترى إيه قصة طرح المطارات المصرية للقطاع الخاص، هل الحكومة بتفكر تستثمر أصول المطارات ولا هتطرحها للتشغيل فقط عشان تزود إيراداتها وتقدر تساهم في دعم الاقتصاد، وإزاي وامته الخطة دي هتم؟
في الحقيقة، ملف طرح إدارة وتشغيل المطارات المصرية للقطاع الخاص بيعتبر من أهم الملفات المطروحة على طاولة الحكومة دلوقتي، وبتيجي تأكيد لحرص الحكومة على تطبيق وثيقة سياسة ملكية الدولة، ودعم وتعزيز دور القطاع الخاص بصفة عامة، عشان تزود مشاركته في الأنشطة الاقتصادية المختلفة.
وحاليا، الحكومة بتستعد للطرح ده وهتتعاون مع مع كبرى الشركات العالمية العاملة في مجال إدارة المطارات، وممكن شركة "فينسي" العالمية ترسى عليها عملية الطرح، لكن لحد دلوقتي مافيش كلام رسمي عن الجهة المشغلة.
طب يا ترى إيه هي فايدة طرح المطارات للقطاع الخاص؟
بص يا سيدي، الطيران المدني بقى صناعة عالمية، عشات كده دول العالم بتسعى لتطويره عشان له دور جوهري في جذب الأنشطة الاقتصادية والاستثمارية المباشرة، وبيساهم بشكل كبير في تحقيق التنمية الشاملة لمل المجالات الاقتصادية والاجتماعية والثقافية والسياحية.
كمان، مفهوم المطارات اتغير من كونه أحد مقومات البنية التحتية واللي بتخدم نقل الركاب والبضائع جوًا، عشان يكون مركز نقل متعدد الوسائط، بيضم أنشطة تجارية مختلفة، وده دفع كل دول العالم لتبني فكر إبداعي في نظم إنشائها وإدارتها عشان تحافظ على ريادتها ضمن التصنيفات العالمية لشركات الطيران.
أما مكاسب شراكة القطاع الخاص في إدارة المطارات، فنقدر تقول إن الموضوع ده مش جديد ولا بدعة، لأن في عدد هائل من المطارات الدولية واللي بتتمتع بسمعة وجودة دولية جيدة، بيتم إداراتها من قبل شركات خاصة.
برضو، الطرح ده مش هيكون طرح للأصول، خاصة وإن المرحلة الأولى من الطرح، هتكون لمطارات القاهرة الدولي وسفنكس والعلمين الجديدة وشرم الشيخ والغردقة، وبتتنافس كبرى الشركات العالمية المتخصصة في إدارة المطارات في العالم على الطرح المصري عشان المكاسب اللي بالمليارات.
ضيف على ده، إن إدارة المطارات المصرية من قبل شركات عالمية هيحفز شركات كبيرة في مناطق مختلفة من العالم على تشغيل رحلات مباشرة لمطارات مصر، خاصة من أمريكا ودول أوروبا وشرق آسيا، وده هيفتح التحسينات على المجال، وهيزود من الخطوط الجوية اللي هتشغل رحلات مباشرة لوجهات جديدة، وكمان هيعزز التواصل مع الأسواق العالمية، وبالتالي هيزود حركة نقل الركاب والبضائع والتدفقات السياحية وكمان هيعزز النمو الاقتصادي.
ولو ماتعرقش، فقطاع الطيران له تأثير مباشر على قطاعات اقتصادية تانية، زي السياحة والتجار والاستثمار، وكمان طرح المطارات بيعتبر خطوة مهمة لجعل مصر مركز إقليمي للنقل الجوي إقليميًا وعالميًا.
عشان كده، إدارة المطارات من قبل القطاع الخاص أصبحت ضرورة في دول كتيرة، لأن التجربة دي حققت نجاح كبير، وكان من أهم فوايدها هو تحسين كفاءة المطارات، وزيادة أرباحها، وتحسين تجربة المسافرين وتحقيق مكاسب للطرفين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
