هو ليه كل شوية بنسمع عن أذون خزانة وأدوات دين جديدة؟ الفلوس دي بتروح فين؟ ومين اللي بيستفيد منها؟ وايه علاقة وزارة المالية بالموضوع ؟
البنك المركزي المصري لسة طارح النهاردة أذون خزانة بـ100 مليار جنيه والهدف منها جذي السيولة والسيطرة عليها فى اطار محاولات كبح جماح التضخم.
طب هي ايه أصلا أذون الخزانة دي ؟
ببساطة.. دي زي ورقة قرض قصيرة الأجل بتطلعها الحكومة عن طريق البنك المركزي بتتراوح مابين 3 شهور لسنة.. وبتبقى بمبالغ ضخمة زي الـ100 مليار اللي سمعنا عنهم قريب.
طب ليه بيعملوا كده؟
عشان يلمّوا فلوس بسرعة من السوق.. يعني زي ما تكون الحكومة بتقول للبنوك والمستثمرين 'تعالوا ادّوني فلوس دلوقتي، وأنا هديكم عائد حلو بعد شوية'.. والعائد ده بيبقى مغري جدًا يعني تخيّل أحيانًا بيوصل لـ29 أو 30% في السنة.
طب والفلوس دي بتروح فين؟
هنا بقى تدخل وزارة المالية في اللعبة.. البنك المركزي مش بيطلّع الأذون دي من دماغه.. لا ده بيعمل كده نيابة عن وزارة المالية.. اللي هي المسؤولة عن موازنة الدولة.. يعني الفلوس دي بتروح عشان تسد العجز في الموازنة.. و العجز بيحصل ببساطة لما الحكومة بتصرف أكتر ما بتكسب من الضرايب والإيرادات.. ووقتها بتحتاج فلوس زيادة عشان تدفع مرتبات الموظفين.. وتعمل مشاريع زي طرق وكباري.. وتسد فواتير الدعم زي السلع التموينية والكهربا.. يعني الأذون دي بتبقى زي العكاز اللي بتسند الحكومة لحد ما الاقتصاد يقوى.
بس الموضوع مش بسيط أوي كده.. لما بنسمع إن البنك المركزي طرح أذون بـ100 مليار جنيه، ده معناه إن في حاجة للسيولة دي حالا.. يعني ممكن يكون في ضغط على الخزانة العامة أو ممكن الحكومة عايزة تسحب فلوس من السوق عشان تقلل التضخم.. لأن لما الفلوس الكتير تبقى موجودة في إيد الناس من غير ما يقابلها إنتاج كفاية.. الأسعار بتعلى.. والجنيه بيضعف.. فالحكومة بتحاول تلعبها صح تسحب السيولة دي عن طريق أذون الخزانة وتستخدمها في نفس الوقت.
طب البنوك والمستثمرين بيشتروا الأذون دي ليه؟
عشان العائد العالي.. يعني لو إنتَمكان البنك، والبنك المركزي بيقولك:"هات 10 مليار جنيه، وأنا بعد سنة هديكهم لك بـ13 مليار هتقول لأ؟ طبعًا لأ.. دي صفقة ما تترفضش.. والحكومة كمان مستفيدة.. عشان بتاخد الفلوس دلوقتي وتبقى تدفع بعدين.
طب ايه علاقة وزارة المالية؟
علاقة وزارة المالية بالموضوع واضحة زي الشمس.. هي اللي بتحدد احتياجاتها.. وبتقول للبنك المركزي أنا عايزة كذا مليار عشان أسد العجز ده.. البنك المركزي بقى بيبقى الوسيط.. بيطلّع الأذون أو السندات.. وبيبيعها للبنوك والمؤسسات المالية.. وفي الآخر الفلوس بتروح لخزينة الدولة تحت إشراف وزارة المالية.
بس في نقطة لازم نكون واخدين بالنا منها.. وهى ان لما الحكومة بتعتمد كتير على أذون الخزانة وأدوات الدين.. ده ممكن يزود الدين العام.. يعني كل ما نطرح أذون أكتر كل ما الدين بيكبر.. وكل ما الفوايد اللي لازم ندفعها بتعلى.. و في تقارير بتقول إن الحكومة بتستهدف تقليل الدين لـ89% من الناتج المحلي بحلول 2025 بس لو الوضع فضل كده ممكن الخطة دي تتعطل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
